Skare Ungdomslag har vist vilje og evne til å engasjera mange i bygda. I dei siste 30-40 åra har Skarekrinsen endra seg frå eit bygdesamfunn til å vera dominert av eit stort byggefelt med mange innflyttarar der dei fleste arbeider i Odda. Krinsen er i dag inne i ei positiv utvikling. For dei som har flytt til bygda, har ungdomslaget også vorte ein møtestad og eit kulturtilbod.

Laget fylgjer med i tida og har ei flott heimeside på internett. Denne nettstaden viser  at laget har mange allsidige tilbod for born og ungdom i alle aldrar – og alt er presentert på nynorsk.

I  jubileumsåret 2008 markerte laget seg med ei rekkje tilskipingar. Odda Mållag la særleg merke til teaterlaget si framføring av ”Hjelp, det spøkjer”, som handlar om vennskap og mobbing i ein skuleklasse. Manuset var omsett til nynorsk av leiaren i laget – eit storarbeid, berre det!

Skare Ungdomslag  skaper trivsel i bygda og gjer eit viktig kulturarbeid, som ikkje minst er med på å gjera dei unge tryggare i bruk av eigen dialekt og av nynorsk. Årsmøtet i Odda Mållag tildeler Skare Ungdomslag  Målprisen for 2008, ein lithografi, ”Bokstavflygaren”, av Solveig Aksnes.